நீங்கள் தேடியது "மணல் லாரிகள்"

புதுச்சேரி:

புதுவை மாநிலம் காரைக்கால் மாவட்டம் திருநள்ளாறு பகுதிகளில் இருந்து சாலை மற்றும் ரெயில்வே பணி விரிவாக்க பணிகளுக்காக தினந்தோறும் மணல் ஏற்றிக் கொண்டு 100-க்கும் மேற்பட்ட லாரிகள் சென்று வருகிறது.

இந்த லாரிகள் எந்தவித சாலை விதிகளையும் பின்பற்றாமல் அதிவேகத்தில் செல்வதால் தொடர் விபத்துகள் ஏற்படுகிறது. லாரிகளில் இருந்து வெளியேறும் மண் புழுதிகளால் எதிரில் வரும் வாகனங்களுக்கு விபத்து ஏற்படுவதாக பொது மக்கள் குற்றம்சாட்டி வந்தனர்.

அதிவேகமாக சென்று வரும் லாரிகளால் விபத்தும், உயிரிழப்பும் ஏற்பட்டுள்ளது. சில மாதங்களுக்கு முன்பு கல்லூரி மாணவர்கள் இருவர் மணல் லாரியால் விபத்து ஏற்பட்டு உயிர் இழந்துள்ளனர்.

பள்ளிகளுக்கு மாணவர்களுக்கு சென்று வரும் நேரத்தில் அதிவேகத்தில் மணல் லாரி இயக்கப்படுவதாக மாவட்ட போக்குவரத்துத் துறை போலீசாரிடம் பொதுமக்கள் புகார் கூறினர்.

இதனால் காலை 8.30 மணியிலிருந்து 9.30 மணி வரையும், மாலை 4 முதல் 5 மணி வரையும் லாரிகள் இயக்கக் கூடாது என்று உத்தரவு போடப்பட்டது. ஆனால் உத்தரவை காற்றில் பறக்க விட்டு மணல் லாரிகள் வழக்கம் போல் பள்ளி விடும் நேரத்தில் அதிவேகமாக இயங்கி வந்தன.

இதையடுத்து திருநள்ளாறு சாலையில் போக்குவரத்து ஆய்வாளர் லெனின் பாரதி தலைமையான போலீசார் திடீர் ஆய்வு மேற்கொண்டனர். அப்போது அதிவேகமாக சென்ற 30-க்கும் மேற்பட்ட லாரிகளை மடக்கிப் பிடித்தனர். இதில் பெரும்பாலானோர் ஓட்டுநர் உரிமம் உட்பட ஆவணங்கள் இன்றி வாகனங்கள் இயக்குவது தெரிந்தது. அவர்கள் மீது வழக்கு பதிவு செய்யப்பட்டது.

ஆய்வின்போது ஒரு ஓட்டுநர் தனக்கு தெரிந்த வி.ஐ.பி. பேசுவதாக கூறி போனை ஆய்வாளரிடம் கொடுக்க வந்தார். போனை வாங்க மறுத்த ஆய்வாளர் கடுமையான எச்சரிக்கை விடுத்தார். பொது மக்களின் உயிர் மீது அக்கறை இல்லாமல், பாதுகாப்பு அம்சங்கள் ஏதுமின்றி லாரிகளை இயக்கினால் இனிவரும் காலங்களில் தண்டனை கடுமையாக இருக்கும் என எச்சரித்து அவர்களை அனுப்பி வைத்தார்.

தென்காசி:

தென்காசி மாவட்டம் திரவிய நகர், பழைய குற்றாலம், மத்தளம்பாறை உள்ளிட்ட பகுதிகளில் இருந்து தென்காசி மற்றும் கேரளாவிற்கு கட்டுமான பணிகளுக்காக லாரிகளில் மணல் ஏற்றிச் செல்லப்படுகின்றன. மணல் ஏற்றிச் செல்லும் பொழுது அதனை தார்ப்பாய்கள் கொண்டு மூடி செல்லவேண்டும் என்பது விதி. ஆனால் திரவிய நகரில் இருந்து தென்காசி சாலை வழியாக செல்லும் லாரிகளில் மணலை தார்ப்பாய்களால் மூடாமல் செல்வதால் பின்னால் இருசக்கர வாகனத்தில் செல்லும் வாகன ஓட்டிகளின் கண்களை லாரியிலிருந்து காற்றில் பறக்கும் மணல் துகள்கள் பதம் பார்த்து வருகின்றன.

இதில் பல வாகன ஓட்டிகள் சாலையில் இருந்து கீழே தவறி விழுந்து விபத்து ஏற்படுகிறது.

எனவே சம்பந்தப்பட்ட அதிகாரிகள் மணல் ஏற்றிச் செல்லும் லாரிகளில் பாதுகாப்புடன் மணல் துகள்கள் காற்றில் பறக்காத வண்ணம் தார்ப்பாய்களால் மூடி கொண்டு செல்ல நடவடிக்கை எடுக்க வேண்டும் என திரவிய நகர், மத்தளம்பாறை பகுதி பொதுமக்கள் மற்றும் வாகன ஓட்டிகள் கோரிக்கை விடுத்துள்ளனர்.

சீர்காழி:

சீர்காழி அருகே கொள்ளிடம் ஆற்றில் பாலூரான்படுகை, குன்னம் ஆகிய 2 இடங்களில் யார்டு அமைக்கப்பட்டு மணல் விற்பனை நடைபெற்று வருகிறது. ஆன்லைன் புக்கிங் மூலம் நாள்தோறும் 500க்கும் மேற்பட்ட லாரிகள் மற்றும் சிறு டிராக்டர்களில் மணல் ஏற்றி செல்லப்படுகிறது.

இவ்வாறு சீர்காழி மற்றும் வெளிமாவட்டங்களுக்கு லாரிகள், டிராக்டர்களில் மணல் ஏற்றி செல்லும்போது மேல்பகுதியை தார்பாய் கொண்டு மூடாமல் எடுத்து செல்லப்படுவதால் சாலைகளில் செல்லும் இருசக்கர வாகன ஓட்டிகள் மற்றும் பொதுமக்களின் கண்களில் மணல் துகள்கள் விழுந்து பாதிப்பு ஏற்படுகிறது. அதோடு இருசக்கர வாகன ஓட்டிகளின் கண்களில் மணல் துகள்விழும்போது தடுமாறி வாகன விபத்துக்கள் ஏற்படுகிறது.

அதேபோல் நகர் பகுதிகளில் மணல் ஏற்றிசெல்லும் லாரிகள், கனரக லாரிகள், டிராக்டர்கள் அதிவேகமாக செல்வதால் விபத்துக்கள் ஏற்படும் அபாயம் எழுந்துள்ளது. ஆகையால் மணல் சேமிப்பு கிடங்குகளிலிருந்து மணல் ஏற்றிவரும் லாரிகள் தார்போய் கொண்டு மூடப்பட்டு கொண்டு செல்வதை உறுதி செய்வதோடு உரிய ஆவணங்கள் மற்றும் ஓட்டுனர் உரிமம் இன்றி மணல் லாரிகள் இயக்கப்படுகிறதா என்பதையும் சம்பத்தப்பட்ட துறை அதிகாரிகள் தீவிரமாக கண்காணித்து நடவடிக்கை எடுக்கவேண்டும் என பொதுமக்கள் கோரிக்கை விடுத்துள்ளனர்.

பூதலூர்:

திருக்காட்டுப்பள்ளி அருகில் கொள்ளிடம் ஆற்றில் மருவூர் மற்றும் கோவிலடியில் அரசு மணல் குவாரிகள் திறக்கப்பட்டு மணல் விற்பனை செய்யப்பட்டு வருகிறது. தினமும் மணல் ஏற்றிய லாரிகள் திருக்காட்டுப்பள்ளி நகரின் வழியாக வெளியூர்களுக்கு சென்று வருகின்றன. இவ்வாறு சென்றுவரும் லாரிகளில் பெரும்பாலான லாரிகள் ஏற்றப்பட்ட மணல் மீது தார்பாய் கொண்டு மூடாமல் அப்படியே சென்று கொண்டுள்ளன. இதனால் லாரிகள் போகும் வேகத்தில் வீசும் காற்றால் லாரியில் உள்ள மணல் பின்னால் வரும் வாகனங்களை ஓட்டி வருபவர்களின் கண்களில் விழுந்து மிகுந்த சிரமத்தை ஏற்படுத்துகின்றன.

மணல் ஏற்றி வரும் லாரிகள் தார்பாய் கொண்டு மணலை மூடி எடுத்துச் செல்ல வேண்டும் என்று விதிமுறை இருந்த போதும், அதனை கடைபிடிக்காமல் செல்வதால் வாகன ஓட்டிகள் கடும் சிரமத்திற்கு ஆளாகின்றனர்.

மருவூர் மணல் குவாரி இடத்தின் அருகிலேயே காவல் நிலையம் உள்ளது. அப்படி இருந்தும் கூட மணல் லாரிகள் தார்ப்பாய் கொண்டு மூடாமல் செல்கின்றனர். உடனடியாக மணல் ஏற்றி வரும் லாரிகள் முறையாக தார்பாய் கொண்டு மூடி செல்வதற்கு நடவடிக்கை எடுக்க வேண்டும் என்று சமூக ஆர்வலர்கள், வாகன ஓட்டிகள் கோரிக்கை விடுத்துள்ளனர்.